Lubong

Ni Jona Branzuela Bering

Pina-agi sa nangunot nga mga kamot,

Gikuykoy ang nagtigang yuta

Sa Carreta. Bisan ang mga talidsik

Gikan sa mga mata nga kani-adto

Nagdahom nga imong lingi-on,

Inanay nga gilukipan sa salbahis

Nga katarata wa nakapahumok

Sa nagpagtok nga yuta nga

Gitunub-tunoban sa mga niaging

Panahon.

Nabangag, inig kadakoa sa kumo.

Ang talidsik, nahimong dagkong

Lugas sa pagdawat nga ikaw

Dili gayod ma-ankon.

Kulitigon nako ang imong ngalan

(Gamit ang kutsilyo nga gibaid

Sa mga panghupaw og pangagho)

Nga natagik sa kasing-kasing

Og ma-ampingong isod sa bangag

Sama sa paglaylay? sa duyan aron

Makatog sa hingpit kining pagbati.

Dayon tabunan sa nakuykoy nga tipaka

Sa kalibotan.

Tudsokan og kandila, mangaliya,

Nga ang imong ngalan dili

Mo-gawas sa lubnganan

Og kagon ang malinawon

Nakong dughan.