Balak: Ang Panyo ni Veronica

*draft

ni Jona Branzuela Bering


Ganahan unta ko mangutana
sa kahimtang sa imong panyo.
Nabantayan man gyod nako'ng
hanas ka sa pagpanarapo. Dali
kaayo ka madani sa mga lalaki'ng
nag-antos, unya dayon, hinay-
hinayon nimo'g trapo ang ilang
kasubo hangtod nga mawa na kini
sa hingpit ug motapot, mopilit
sa imong panyo. Ganahan unta
ko mangutana kay bisan ba,
Veronica, sa sige nimong limpyo
sa ilang mga kasakit, nakalimot
naka nga ang imo sad diay'ng
panyo angay ng labhan, limpyohan.