Balak::: Tulo Ka Imahe sa Samin

I did describe the mirror briefly . . . It was . . . A full and empty thing, dense with images in one place, vacant in another.
---Siri Hustvedt, The Blindfold


Unang imahe:

Nag-atubang sa display
Window sa usa ka appliance
Center. Sa likod sa bildo, nanghupaw
Ang bag-ong TV unit sa Sony, gilaay
Sa iyang dagway’ng gibalik-balika’g
Dagan sa mga anino ibabaw
sa tubig---usa ka mammoth, gisundan
Sa usa ka tigre, ug laing usa ka
Mammoth nga naghuna-hunang usa
Siya ka possum. Sa bildo maaninag
Ang mga inamang katawa sa ubang
mga tawo. Nanglapos ang kaputi,
Kayellow sa ilang mga agik-ik pagkakita
sa mammoth nga nagbitay
Sa sanga sa kahoy. Samtang ang uban
Nang-ismid kay ang mammoth, labaw
Na ang possum wa natawo

sa ilang kalibutan.

Ikaduhang imahe:

Ang samin sa Tubod, nakatag-iyag
Usa ka pamilyahang hulagway: amahang
Nagpomada kay naay tari sa lungsod,
Inahang nanudlay una modalikyat
Sa silingan ug manung’g tabi, nangawat
si undo sa pomada sa iyang amahan
kay unya naay bayle sa pikas
baryo, yamat na lang, makakaplag
ug dalaga, si inday namulbos
una ninggikan padung sa sapa
ug naglaba samtang ningpahiyom
Pag-agi ni Kulas nga nagpatuna
Sa kabaw. Ug ang duha ka batang
Gagmayng nahabilin sa panimalay
Nagduwa, ang ginamanghurang
Nagpangidad ug duha ka tuig, natingala
Sa ninglihok nga repleksyon nga naa
sa kuwadrong gikuha sa iyang igsuon
Gika sa altar. Ningpunit
ug bato. Gipukpok.

Maayo niining pagkakagay.


Ikatulong imahe:

Nasaulo nimo ang tanang
Suok sa inyong panimalay
Sama sa pagsaulo sa usa
Ka linya sa paboritong nobela---
“Wondered which had changed
the most, place or self?” Apan
Sama pagsaulo, di ka sigurado
Kon sakto ang mga pulong
Gigamit, bisan sa gamayng
Kinabuhi sa usa ka comma.
Maong sa pag-uli nimo
Sa inyo, nakamatikod
Kang naay kuwang, o naay
Nakuha, sa inyong panimalay
Apan wa nimo nahikaplagan
Ang saktong pulong para niini.
Diha naka nakasakop niining pulonga
Paglipot nimo sa likod sa inyong
Balay ug nakit-an nimo ang imong
Nagpikas-pikas nga dagway

Sa nabuak nga samin.

Ego tripping::: A Year After

MOLAKAW NA GYUD DIAY KA?
By gmp (Alang kang Jona B. Bering)



Unsa to?
Molakaw na ka?
Sama ning pa’d sa kabuntagon nga daklit
Mutapion
Sa akong aping
Ug dayon mugikan kay ngitngit na sad?
O kaha ingun ba sa tambutso
Nga way kaikog muluwa
Sa iyang mga hang-ups
Ning gi-jobosan kong mga aping
Ug unya musutoy lang dayon palayo?
O gani ikaw ba kadtong
Akong tisoy nga uyab kaniadto
Nga dihang nahurot
Ang siopao sa among sarisari store
Nalibat
Nahanaw
Kay kunu wa na katultol
Asa ang amoa?

Nya, unsa man?
Mulakaw na gyud ka?
Wa pa gani ko
Mahuman ug ihap
Kung pila sa mga linya
sa imong mga balak
Ang mitadlas
Sa nataran ning
Cebu Normal University.
Magpaanod pa gani ko
Sa modernong hagtik
Sa imong mga tinagik.
Buot ko pa ganing
Masinati pag-usab
Ang maghubog-hubog
Sa bino sa panulat ug arte.
Pinaagi sa tabas
Sa imong mga linya
O kaha sa dahunog
Sa imong mga pulso.

Ayaw sa uy
Puyu sa.
Pasigaa pa ang suga.


Pero kung mulakaw na gyud ka
Sige
Kay naa o,
Nagpangamay na
Ang imong damgo
Nuntan ko lang
Ang imong tingog
Basin pa diay
Matawo ko pag-usab
Ug mubalik didto
Diin hangol pa ko
Sa bunal ug liti
Sa mga linya ug garay

Ubanan ko na lang kaha
Ning Cebu Normal University
dinhi sa suok
Sa Jones Avenue
Maghinuktok, magmukmok
Maghulat kanus-a mahubog
Ikaw bay makasaksi
Sa unang uha sa bag-ong nahimugso
Nga balak
Dinhi sa alimuot ug abogon
Apan nadan-agan nga ang suga.
Lalim ba!

Desktop::: Pote Look-alike