Balak:::Dyslexia

ni Jona Branzuela Bering


Uy, Ondo!
Tingalig naa ka ining sakita,
kay-- unsa ba?--maglisod
man kag basa sa matuod
nga istorya.


Samot na ang pagbasa
sa tingog sa budlat
nakong mata,
nga naglanog:
Ikaw ra, ikaw ra.

Balak:::Amnesia

ni Jona Branzuela Bering


"He thinks we all have been cured. He believes
in amnesia and he will never mention it again."
— Margaret Atwood, Under Glass


Naayo na ta, ingon ka.
Nasamdan lagi tang duha.
Apan kon buot huna-hunaon,
garas ray imong naangkon
gikan sa kasaba samtang
ang akong samad ningtadlas
sa akong utok padung sa dughan
gikan ikaw nasakpan nakong hubo
ibabaw sa giingon nimong ig-agaw
nga nanimpalad sa syudad.
Ikaw, dala tingali sa sakit
sa utok, dali kaayo
nakalimot. Naayo na pod ko.
Apan ayaw pagdahom nga
maayo pa tang duha.

kuwidaw.multiply.com and balaybalakasoy.blogspot.com