Balak: Sa Imong Pagbiya

Sa Imong Pagbiya
ni Jona Branzuela Bering


*draft



ayaw kalimti'g tan-aw
ang sulod sa imong payag

hinumdomi'ng kini ang nag-inusarang
saksi sa imong kaugalingon

dinhi

ang bungbong nanglili
sa love letter nga imong gisuwat

dinhi

ang katri nakadungog
sa imong gipangyawyaw
samtang gadamgo'g ugdo,
hamis, dughan, sampot

dinhi

ang sawg nga kawayan
nakakita sa tanan
nimong tinaguan:
bisag unsaon pa
nimog kipi,
way maka-ipsot sa
mata sa sawg.

dinhi

ang mga abog nahimong
bahin sa tanan
nimong butang

susama

ang imong kaugalingon
nahimong bahin sa imong payag.


maong unyag biya nimo
palihug
ayaw kalimtig sud-on ang
sulod sa imong payag.


Kay

Dinhi

Dinhi

nagpuyo
nahiluna

ang imong kaugalingon.