Happy New Year!

ni Jona Branzuela Bering


Sa mga Chinese
kinahanglang daghang lingin
aron daghang grasya
ang musod sa bag-ong tuig.
Payts na tingali ni ako:
lingin ang mga kalimutaw
sa akong walo ka mga anak,
nagsiga kay wap-ay panihapon
karong usa nalang ka oras
ang nagbitay una maputol
ang gininhawa niining tuiga.
lingin ang bola nga napunitan
ni Dado didto sa basurahan
kilid sa banko nga daghag tawng
isig withdraw. Lingin akong
handuraw nga nagsigeg tuyok
sa palibot bisag naay putos
nga Jollibee o Mcdo. Lingin sad
ang mga tiyan sa akong
mga anak nga klarong gibitok.
Lingin sad ang tiles dire
sa skywalk sa Robinsons.
Ako sad, lingin ang tiyan,
sa pagpaabot sad sa ikasiyam.