Balak:::Lubong

ni Jona Branzuela Bering

This is a college poem, and November 1 is few steps away, might as well post it again. :)


Pinaagi sa nangunot nga mga kamot
Gikuykoy ang tig-ang yuta
Sa Carreta. Bisan ang mga taligsik
Gikan sa mga mata nga kaniadto
Nagdahom nga imong lingi-on,
Nga inanayng' gilukipan sa salbahis
Nga katarata wa nakapahumok
Sa nagbagtok nga yuta, gitunob-

tunoban sa nangaging

panahon.

Nabangag, ingog kadako sa kumo.
Ang taligsik nahimong dagkong
Lugas sa pagdawat nga ikaw
Dili gayod maangkon.
Kulitigon nako ang imong ngalan
(Gamit ang kutsilyo nga gibaid
Sa mga panghupaw ug pangagho)
Nga natagik sa kasingkasing
Ug maampingong is'od sa bangag
Sama sa paglaylay sa duyan aron
Makatog sa hingpit. Dayon tabunan

Sa nakuykoy nga tipaka
Sa kalibotan.

Tudsokan og kandila, mangaliya,
Nga ang imong ngalan dili
Mogawas sa lubnganan
Aron dili kagon ang malinawon
Nakong dughan.